DF oo shaaca ka qaaday in la soo afjaray weerarkii xarunta gobolka Banaadir

0

MUQDISHO (SMN) – Warsaxaafadeed ka soo baxay Wasaaradda Warfaafinta Soomaaliya ayaa looga hadlay weerarkii tooska ahaa ee ay maanta Al-Shabaab ku qaadeen xarunta maamulka gobolka Banaadir, kaas oo ku billowday qaraxyo xoogan.

Wasaaradda Warfaafinta ayaa shaaca ka qaaday in ugu dambeyn la soo afjaray weerarkan kadib howlgal ay sameeyeen ciidamada Booliska Soomaaliya.

Halkan hoose ka aqriso:- 

WAR SAXAAFADEED

Ciidamada Amniga ayaa soo gabagabeeyay weerar koox Khawaarij ah ay kusoo qaadeen Xarunta Maamulka Gobalka Banaadir

Muqdisho, 22 January 2023:
Maanta ayaa koox ka tirsan maleeshiyaadka Khawaarijta ah waxay soo weerareen Xarunta Maamulka Gobalka Banaadir

Ciidamada amniga oo ahaa kuwa aad u feejigan ayaa goobtaas ka fuliyay hawlgal labo qaybood ah, qaybta hore oo ahayd badbaadinta masuuliyiinta iyo muwaadiniinta ku sugnayd goobta ayay ciidamadu fuliyeen sidii ay qorsheeyeen iyaga oo ku guulaystay in ay ka soo saaraan halkaas iyaga oo bad qaba.

Qaybta labaad ee hawlgalka ciidamada oo ahaa in la soo afjaro maleeshiyaadkii Khawaarijta ahaa ayay isna ciidamadu soo gabagabeeyeen iyaga oo toogtay Kooxdii Khawaarijta ahayd oo ka koobnaa 6 dhagarqabe.

Weerarka Khawaarijta waxaa ku shahiiday 5 ruux oo shacab ah, afar kalena way ku dhaawacmeen.

Maleeshiyaadka Khawaarijta ahaa ee goobta yimid ayaa ahaa kuwa lugaynaya iskuna ekaysiiyay Ciidamada Qaranka si ay halkaas usoo gaaraan.

Dowladdu waxay u tacsiyaynaysaa muwaadiniinta halkaas ku shahiiday iyada oo Allah uga baryaysa caafimaad deg deg ah kuwa dhaawacmay.

Falalkan waxashmimada ah ee ay geysanayaan Khawaarijtu waxay dowladda iyo dadka Soomaaliyeed u caddeyneysaa sida ay lagama maarmaan u tahay in Khawaarijta laga suuliyo gebi ahaanba geyiga Soomaaliyeed, iyadoo uu dalka ka socdo dagaalka looga xoreynayo kooxda Khawaarijta.
-Dhammad-

LEAVE A REPLY

Please enter your comment!
Please enter your name here