Maamulka dowlad degaanka oo sheegay in lasoo afjaray weerarkii Al-Shabaab

0

JIGJIGA (SMN) – Warsaxaafadeed kasoo baxay guddiga amniga ee is-maamulka Soomaalida Itoobiya ayaa waxaa looga hadlay weerarkii cuslaa ee ay xoogaga Al-Shabaab ku qaadeen qaybo ka mid ah deegaankaasi, gaar ahaan gobolka Afdheer kaas oo qaatay afar maalin oo xiriir ah.

Qoraalka guddiga ayaa waxaa lagu sheegay weerarkan Al-Shabaab looga dilay illaa 100 xubnood, sidoo kalena looga furtay hub, sida lagu sheegay war-murtiyeedka.

Arrintaan ayaa timid kadib markii Al-Shabaab ay Arbacadii sheegatay in ugu yaraan 87 ka tirsan ciidamada Liyu Boolis, kadib weerar naadir ah oo ka dhacay xadka dheer ee Itoobiya.

Halkan hoose ka aqriso:-

Waxaa la soo afjaray kooxdii Argagixisada Alshabaab ee 4 maalmood ka hor duulaanka ka soo qaaday aaga “Aato” ee soo gashay Gobalka Afdheer kadib markii ay Ciidamada Xooga Gaarka ee DDS ay ku hareereyeen aaga “Hulhul”, waxaana la laayay dhamaanba Argagixisadii naf la caariga ahayd.

Kooxdan Argagixisada Alshabaab ayaa ujeedkooda iyo damacoodu ahaa in ay galaan Deegaanka Oromiya iyagoo raba in ay sii maraan Dagmada Celkari oo ay ku biiraan kooxda argagixisada ee Shane.

Argagixisada naf la caariga ee Al shabaab iyagoo an gaadhin halkii ay u socdeen ayaa waxaa laga gubay 13 Baabuur oo ay wateen, waxaana laga qabtay dhamaanba Hub, isgaadhsiin iyo Agabkii ay wateen.

Hawlgalka ay Ciidamada Xooga gaarka DDS ay qaadeen sadex dii maalmood ee la soo dhaafay ayaa waxaa lagu dilay in ka badan 100 xubnood oo ka tirsanayd Argagixisada Alshabaab.

Guusha ay gaadheen Geesiyada xooga gaarka ee Dawlada Deegaanka Somaalida iyo in la soo af jaro hawlgalka waxaa qayb libaax ka qaatay Shacabka Deegaanka Soomaalida , oo Ciidamada Xooga gaarka ah garab istaag heerkii usaraysay umuujiyay, iyagoo ugu deeqay Raashin kala duwan, Xoolaha nool, Cabitaanno, Lacag iyo waliba Dhiig shubis.

Sidas darteed Golaha amaanka ee Dawlada Deegaanka Soomalidu waxa uu u mahad celinayaa shacabka Deegaanka oo sidii horayba loogu yaqiinay ugarab istaagay Ciidamadooda.

Ugu dambayn Goluhu waxa uu shacabka la wadaagi doonaa xogaha ku saabsan Hawlgalka.

LEAVE A REPLY

Please enter your comment!
Please enter your name here