Afhayeenka xukuumadda Soomaaliya Mudane Maxamed Ibraahin Macalimuu oo la hadlayey wariyeyaasha ayaa sheegay in xukuumadda Soomaaliya ay si toos ah u fara-gelineyso xiisada siyaasadeed ee ka taagan magaalada Beledweyne, si xal waara looga gaaro.
Macalimuu ayaa shaaca ka qaaday in ra’iisul wasaare Rooble uu haatan diyaar u yahay xalinta tabashada shacabka reer Hiiraan ee ku aadan dhismaha HirShabelle.
Sidoo kale wuxuu tilmaamay in xukuumaddu ay xooga saari doonto wada-hadallo xal rasmi ah looga gaarayo arrinata Beledweyne oo saameyn xoogan ku yeelatay doorashooyinka.
Dhowaan ayey aheyd markii ciidamo la magac baxay bad-baadada Hiiraan ay la wareegeen qeybo ka mid ah Beledweyne, iyaga oo ka soo horjeeda safarka Cali Guudlaawe.
