MUQDISHO (SMN) – Wasiirka Wasaaradda Amniga Gudaha JFS, Mudane Maxamed Shiikh Cali Doodishe, Taliyaha Ciidanka Boliiska Soomaaliyeed, Sareeye Guuto. Sulub Axmed Firin, Taliye Xigeenka Ciidanka Boliiska, Sareeye Guuto. Cusmaan Cabdulaahi Maxamed (Kaniif), Agaasimaha Guud ee Wasaaradda Amniga, Mudane Yuusuf Cali, Taliyaha Qeybta Guud ee Boliiska Gobolka Banaadir, Col. Macalin Mahadi iyo Saraakiisha Howlgalka Ciiltire, ayaa kulan oo looga arinsanayo sugida Amniga iyo xasiloonidda caasimadda iyo nawaaxigeeda ku yeeshay xarunta wasaaradda amniga hudaga JFS.
Inta uu kulanka socday ayaa laga xog wareystay saraakiisha hoggaaminaysa Howlgalka Ciiltire sidii loo adkeen lahaa ammaanka caasimadda, inta lagu guda jiro maalmaha Ciidda iyo toddobaadka xorriyadda.
Sidoo kale kulankan ayaa warbixino looga dhageystay saraakiisha laamaha amniga ee qaabilsan caasimada, kuwaas oo ka warbixiyay howlgalladii ugu dambeeyay ee laga sameeyay degmooyinka gobolka Banaadir.
Kulankan ayaa kusoo aaday, xilli maanta qaybo ka mid ah magaalada Muqdisho lagu weeraray tiro hoobiyeyaal ah, walow ay ciidamada ammaanka sameeyeen ka daba-tag, isla-markaana gacanta kusoo dhigay hub, kadib howlgallo ay ka sameeyeen duleedka caasimadda.
