MUQDISHO (SMN) – Ciidamada ammaanka ee dowladda federaalka Soomaaliya ayaa gacanta kusoo dhigay nin ku eedeysan dil maanta nin ganacsade ahaa loogu geystay gudaha degmada Hodan ee gobolka Banaadir.
Ninkan ayaa waxaa soo qabtay ciidamada Booliska ee saldhigga degmadaas, sida lagu sheegay qoraal kasoo baxay taliska Booliska qaybta guud ee gobolka Banaadir.
“11/08/2023 Abaaro 13:30pm, Taliska Qeybta Guud Boliiska G.Banaadir Gaar ahaan ciidanka saldhigga boliiska degmada Hodan ayaa gacanta kusoo dhigay dhagar-qabaha sawirkiisu hoos idinka muuqdo” ayaa lagu yiri warka kasoo baxay booliska gobolka Banaadir.
Sidoo kale taliska ayaa shaaca ka qaaday in eedeysanaha la horgeyn doono maxkamad, si looga qaado tallaabo adag oo sharciga waafaqsan.
“Dhagar-qabahaan ayaa dil u geystay ganacsade soomaaliyeed, waxaana la horgeyn doonaa maxkamadda awoodda u leh hadduu alle idmo” ayaa mar kale lagu yiri qoraalka.
Waxaa kale oo uu boolisku raaciyay “Haddaba muwaadin hadii aad aragto fal amniga liddi ku ah warbixin geey saldhigga kuugu dhow ama wac lambarka gaaban ee 991”.
