NEW YORK (SMN) – Ra’iisul Wasaaraha Xukuumadda Jamhuuriyadda Federaalka Soomaaliya, Mudane Hamza Abdi Barre iyo wafdigii uu hoggaaminayay ayaa saaka gaaray magaalada New York ee dalka Mareykanka.
Xamza iyo wafdigiisa ayaa waxa ay ka qaybgalayaan shirka Golaha loo dhan yahay ee Qaramada Midoobay oo ka dhacay magaalada New York.
Ra’iisul Wasaaraha ayaa ka hadli doona waxa Soomaaliya uga qabsoomay ahdaafta dhinaca horumarka ee Caalamku degsaday gaar ahaan dhimista Faqriga, Caafimaadka, Waxbarashada, Horumarinta Dhaqaalaha, Wax Soosaarka, Xuquuqda aadanaha, Nabadda iyo Amniga, Caddaaladda, dhismaha hey’adaha dowliga oo xooggan iyo isbeddelka cimillada.
Waxaa Ra’iisul Wasaaruhu sheegi doonaa in Soomaaliya ay ku taagan tahay jidkii dib u soo kabashada, isla markaana ay dooneyso in laga taageero dib u dhiska dalka, gaar ahaan ciidamada qaranka si ay ula wareegaan amniga guud ee dalka iyo in Soomaaliya laga qaado cunaqabateynta hubka ee mudada dheer saarneyd.
Ra’iisul Wasaaruhu waxa uu kulamo kula yeelan doonaa Xarunta Qaramada Midoobay, Xoghayaha Guud ee Qaramada Midoobay, Madaxda Dowladda Mareykanka iyo Qaar ka mid ah Madaxda wufuudda kale ee Caalamiga ah ee ka qaybgalaysa shirka Q.M.
Sidoo kale Ra’iisul Wasaaruhu waxa uu la kulmi doonaa Jaaliyadda Soomaaliyeed ee Mareykanka oo uu uga warrami doono guud ahaan xaaladda dalka, gaar ahaan guulaha dowladda iyo shacabka Soomaaliyeed ay ka gaareen ciribtirka Khawaarijta iyo horumarka dhinacyada dhaqaalaha, bulshada iyo siyaasadda ee dowladdu ay ku tallaabsatay mudadii sanadka ahaa ee ay jirtay.
