MUQDISHO (SMN) – Warsaxaafadeed kasoo baxay wasaaradda warfaafinta dowladda Soomaaliya ayaa waxaa looga hadlay howlgallo lagu beegsaday Al-Shabaab oo lagu dilay illaa 59 xubnood.
Howlgalka koowaad oo ka dhacay bariga gobolka Galgaduud ayaa waxaa lagu khaarijiyay 32 Shabaab ahaa, halka 27 kalena lagu dilay howlgal kale oo ka dhacay aagga deegaanka Xawaadley ee gobolka Shabeelaha Dhexe.
Howlgalladan ayaa waxaa si wadajir ah u fuliyay ciidanka Xoogga dalka, Macawiisleyda iyo saaxibada caalamiga ah, sida lagu sheegay qoraalka.
Warsaxaafadeedka ayaa u qornaa sidatan;-
Muqdisho, October 08, 2024: ilaa iyo 59 ka tirsan Khawaarijta ayaa lagu dilay hawlgalo ay horkacayeen Ciidanka Qalabka Sida oo kaashanaya dadka degaanka iyo saaxiibada caalamka oo laga fuliyey deegaano ku yaalla bariga Gobalka Galgaduud iyo Shabeellaha Dhexe.
Hawlgalka koowaad oo lagu dilay 32 dhagar-qabe ah oo isugu jiray horjoogayaal iyo maleeshiyaad Khawaarijta ka tirsanaa ayaa ka dhacay aagga Garilay oo u dhow deegaanka Coosweyne ee Gobalka Galgaduud, waxaana sidoo kale hawlgalkaasi ku shahiiday afar askari oo ka tirsanaa Ciidanka Xoogga Dalka Soomaaliyeed.
Hawlgalka labaad oo lagu laayay 27 dhagar-qabe ayaa wuxuu ka dhacay goob ay cadowgu isku aruursanayeen oo ku taalla tuulada Yaaqle oo dhow deegaanka Xawaadlay ee Gobolka Shabeellaha Dhexe, waxaana sidoo kale hawlgalkaasi lagu burburiyay fariisinkii uu cadowgu isku aruursanayay.
Hawlgalada bartimaameedka ah ee lagu beegsanayo horjoogayaasha iyo maleeshiyaadka Khawaarijta ayaa la kordhiyay, iyadoo maalmihii ugu dambeeyay si wayn cadowga loogu naafeeyay.
