GARBAHAAREY (SMN) – Wararka naga soo gaaraya Gedo ayaa sheegaya in xalay diyaaradaha dagaalka Kenya ay warqado digniin ah ku daadiyeen qaybo kamid ah gobolkaasi.
Waraaqadaha digniinta ayaa lagu arkay deegaanka Faxfaxduun, iyada oo shacabka lagu wargeliyay inay ka fogaadaan meelaha ay ku sugan yihiin xubnaha Al-Shabaab.
Arrintan ayaa cabsi ku beertay dadka deegaanka, waxaana si weyn dhaq-dhaqaaqa looga dareemay aagga deegaankaasi.
Diyaaradaha dagaalka Kenya ayaa inta badan duqeymo ka dhan ah Al-Shabaab ka fuliyay gobollada Jubbooyinka iyo Gedo, halkaas oo ay ka howlgalaan ciidamadooda.
