MUQDISHO (SMN) – Sheekh Cali Wajiis oo kamid ah culimada Soomaaliyeed ayaa ka hadlay khilaafka u dhexeeya dowladda federaalka iyo maamul goboleedka Jubbaland.
Sheekha oo wareysi gaar ah siiyay Shabelle ayaa farriin u diray madaxweyne Axmed Madoobe, wuxuuna ugu baaqay inuu yimaado Muqdisho, lana heshiiyo dowladda dhexe.
Sidoo kale wuxuu kula taliyay inuu ka joogsado doorashada uu ku qabanayo Kismaayo, isla markaana uu kala diro guddiga doorashada ee uu magacaabay.
“Axmed Madoobow nin culimo ah ayaad tahay ee khaatumada ha iskaga dheelin, guddigaan kala dir, diyaarad soo qaado nin geesiyaad tahay, sanadkan ay dowladdu kuu sharciyeysay iska qaado” ayuu wareysiga ku yiri Sheekh Cali Wajiis.
Hadalkan ayaa kusoo aadayo, iyada oo Jubbaland ay shalay ku dhawaaqday inay gebi ahaan xiriirkii u jartay dowladda, sababo la xiriira khilaafka u dhexeeya labada dhinac.
