BOOSAASO [SMN] – Ciidanka la-dagaalanka waxa loogu yeero Argagixisada ee Maamulka Puntland ayaa gacanta ku dhigay saldhigii ugu weynaa ee Keydka Hubka Daacish ee Buuraha Cal-Miskaad, ee gobolkaBari.
Dagaalka Daacish iyo Ciidanka Fulinaya Howlgalka Hilaac ee Puntland ay ku dhawaaqday ayaa kusii fidaya deegaano horleh oo ku teedsan Buurahan Silsilada ah ee isku xira Gobolada Bari iyo Sanaag iyagoo Kooxda daacishna lagala wareegay dhul balaaran oo ay Mudo ka arriminayeen.
Puntland ayaa soo bandhigtay Farriisinka Keydka Hubka ee ay Ciidamadeedu la Wareegeen, iyadoo halkaas ay gaareen saraakiil Sar sare oo uu Hogaaminayo Taliyaha Ciidanka Booliiska Maamulkaasi Muumin Cabdi Shire.
Saraakiisha Ciidanka Puntland ee dul tagay Keydka la qabtay ee Hubka ayaa faahfaahin ka bixiyey noocyada kala duwan ee Hubka ay adeegsan jirtay Kooxda Daacish iyo Guud ahaan Xaalada dagaalka.
Kooxaha Daacish iyo Al-Shabaab ayaa mudo dheer heystay Buuraha Galgala ee Gobolka Bari iyagoo halkaas kasoo maleegi jiray weeraro qorsheysan oo ay ku bartilmaameedsan jireen dadka Shacabka ah.
