MUQDISHO, Soomaaliya – Hoggaamiyeyaasha mucaaradka Soomaaliya ayaa Arbacada Maanta magaalada Muqdisho ku yeeshay shir heer sare ah, kaas oo ah midkii ugu horreeyay ee lagu wado in uu noqdo taxane wadatashi ah, iyadoo khilaafka u dhexeeya mucaaradka iyo dowladda federaalka uu sii xoogeysanayo.
Shirka oo ka dhacay Hotel Jazeera ayaa isugu keenay hoggaamiyeyaal mucaarad oo caan ah kuwaas oo maalmahan si tartiib tartiib ah ugu soo qulqulayay caasimadda.
Qorshaha shirka ayaa ah in la dhiso isbahaysi mucaarad oo mideysan, xilli uu cirka isku shareerayo khilaafka ka taagan wax ka beddelka dastuurka, habraaca doorashada federaalka, iyo istaraatiijiyadda amniga ee dowladda.
Qodobbada ugu adag ee muranka dhaliyay waxaa kamid ah maqnaanshaha maamulada Puntland iyo Jubbaland ee geeddi-socodka siyaasadeed ee dalka, iyo dhaliilaha isa soo taraya ee loo jeedinayo Madaxweynaha Jamhuuriyadda Federaalka, Xasan Sheekh Maxamuud, oo lagu eedeeyay in la’aanta istaraatiijiyad wax ku ool ah ay niyad jab ku keentay la dagaallanka Al-Shabaab.
Fadhiga furitaanka shirka ayaa lagu wadaa in lagu magacaabo afhayeen rasmi ah iyo guddiga isku-duwidda kulamada dambe.
Madaxweynihii hore Maxamed Cabdullaahi Farmaajo ayaa si muuqata uga maqnaa shirka maanta, inkastoo ilo xog-ogaal ah ay sheegayaan in dadaallo ay socdaan si dhammaan hoggaamiyeyaasha mucaaradka loo mideeyo oo qeyb uga noqdaan wada tashiga.
