MUQDISHO – Wararka ka imaanaya deegaanka Ceelhuur oo ku yaalla duleedka magaalada Muqdisho ayaa sheegaya in kooxo hubeysan oo aan la garanaynin ay xalay weerar gaadmo ah ku qaadeen bar kontarool ciidan oo muhiim u ah amniga caasimadda.
Kontaroolka weerarka lagu qaaday ayaa ah mid ku yaalla meel lagu hubiyo gaadiidka ka yimaada gobolka Shabeellaha Hoose, gaar ahaan dhanka deegaanka Jazeera, waxaana loo adeegsadaa baarista gaadiidka soo galaya Muqdisho si looga hortago qaraxyada iyo hubka sharci darrada ah.
Lama xaqiijin khasaaraha rasmiga ah ee ka dhashay weerarka, mana jirto cid si rasmi ah u sheegatay mas’uuliyadda weerarka ilaa hadda.
Saraakiil ammaanka ah oo la hadlay warbaahinta gudaha ayaa sheegay in ciidamada ku sugnaa kontaroolka ay iska difaaceen weerarka, inkastoo faahfaahin dheeri ah aan laga bixin.
Baraha kontaroolka ee ku yaalla duleedka Muqdisho ayaa ah kuwo muhiim u ah sugidda ammaanka caasimadda, iyadoo si joogto ah loogu sameeyo baaritaanno lagu xaqiijinayo badqabka dadka iyo gaadiidka soo galaya magaalada.
Weerarkan ayaa imaanaya xilli la adkeeyay amniga Muqdisho, iyadoo laga baqayo weerarro argagixiso.
