Muqdisho: Wasiirka Gaashaandhigga Soomaaliya, Axmed Macallin Fiqi, ayaa sheegay in diyaar garow xoogan uu ka socdo sidii dib loogu xoreyn lahaa deegaanada yar ee wali ku jira gacanta Al-Shabaab, iyadoo lala kaashanayo Wasaaradda Gaashaandhigga iyo Taliska Ciidanka Xoogga Dalka.
Wasiir Fiqi ayaa ammaanay guulaha isdaba-joogga ah ee ay gaareen Ciidanka Xoogga Dalka Soomaaliyeed, oo iskaashanaya ciidamada deegaanka, intii lagu jiray howlgalladii u dambeeyay ee ka dhacay gobolka Hiiraan. Howlgalladaasi ayaa lagu dilay xubno iyo saraakiil muhiim ah oo ka tirsan kooxaha argagixisada.
Sida ay soo werisay wakaaladda wararka Soomaaliyeed (SONNA), wasiirka ayaa xusay in kooxaha xiriirka la leh Al-Qaacida ay hadda wajahayaan jahwareer iyo niyad-jab, kaddib cadaadiska xoogan ee kaga imanaya ciidamada qaranka iyo iskaashatada deegaanka.
Wuxuu sidoo kale sheegay in maleeshiyaadku ay ku jiraan xaalad adag, islamarkaana tiro badan oo kamid ah xubnahooda ay isku dayayaan inay ka cararaan goobaha dagaalka xilli dagaalladu sii xoogeysteen.
M.A.
