ADDIS ABABA — Itoobiya ayaa ku adkeysanaysa inay sii wado dadaallada sharci iyo wadahadal si ay u hesho marin badeed, ilaa yoolkaas laga gaaro, sida uu sheegay Ra’iisul Wasaaraha Abiy Axmed.
Waraysi uu siiyay EBC, Abiy ayaa muujiyay murugo ku saabsan sida Itoobiya ay u lumisay dekeddeedii, isaga oo tilmaamay in in muddo ka badan saddex sano aysan dalkaasi lahayn marin badeed.
“Baahida Itoobiya ee marin badeed ma aha mid cusub, waxay ahayd mid muhiim ah muddo dheer,” ayuu yiri Ra’iisul Wasaaraha.
Sida uu sheegay, Itoobiya oo ah dal aan bade
ed lahayn ayaa la kulantay caqabado waaweyn, iyadoo lagu xadgudbay sharciyada caalamiga ah ee dalalka badeed la’aanta ah.
“Cadaalad darro muuqata ayaa lagula kacay Itoobiya, taas oo u baahan xal degdeg ah,” ayuu Ra’iisul Wasaaruhu ku adkeystay.
Bishii Oktoobar 2024, Abiy ayaa Golaha Shacabka u sheegay in Itoobiya u baahan tahay marin badeed ku yaalla Badda Cas si nabad ah.
“Dhaqaalaha dalkeena oo sii kordhaya iyo tirada dadka oo gaaraysa 120 milyan, waxay xaq u leenahay marin badeed nabad ku helno,” ayuu intaas ku daray.
Ra’iisul Wasaaraha ayaa sheegay in baahida Itoobiya ee marin badeed ay tahay mid cadaalad iyo sharci ku dhisan, islamarkaana dowladdiisu aysan ka leexan doonin mowqifkaas.
