Muqdisho – Taliyaha Hay’adda Nabad Sugidda iyo Sirdoonka Qaranka (NISA), General Mahad Salaad, ayaa sameeyay balanqaad weyn oo ah inuu furi doono wadooyinka xiran ee magaalada Muqdisho, taas oo haddii ay hirgasho ay farxad weyn u horseedi doonto bulshada ku nool caasimadda.
Muddooyinkii u dambeeyay, magaalada Muqdisho waxaa saameyn ku yeeshay dhibaatooyin badan oo ay kamid yihiin qaraxyada xoogan iyo amni darro, kuwaas oo sababay in qeybo badan oo magaalada kamid ah laga xiro wadooyinka muhiimka ah. Waddooyinkaas waxaa lagu jaray dhagaxaan iyo caqabado kale, taas oo keentay ciriiri xooggan iyo hakad ku yimid dhaq-dhaqaaqa gaadiidka.
Bulshada ku nool Muqdisho ayaa si weyn uga cabanaysa xaaladda wadooyinka, iyadoo mararka qaar ay gaadiidku istaagaan muddo dheer sababo la xiriira ciriiriga iyo isticmaalka wadooyin yaryar oo aan ku filneyn baaxadda magaalada.
Taliyaha NISA, Mahad Salaad, ayaa ku sheegay hadal uu siiyay warbaahinta in uu qorsheynayo in uu la kaashado hay’adaha amniga iyo maamulka gobolka Banaadir si wadajir ah looga shaqeeyo furitaanka wadooyinka xiran, loona yareeyo dhibaatada ciriiriga ee magaalada.
“Waxaan balan qaadayaa inaan si degdeg ah u furno wadooyinka muhiimka ah ee hadda xiran, si bulshada Muqdisho ay u helaan nolol sahlan oo aan la kulmin ciriiri iyo dhibaato kale oo saameysa noloshooda maalinlaha ah,” ayuu yiri Taliyaha.
Si kastaba ha ahaatee, balanqaadka General Mahad Salaad ayaa waxaa ku jira su’aalo badan oo ka taagan bulshada, maadaama aysan ahayn markii ugu horeysay ee masuul Soomaaliyeed uu sameeyo balanqaad noocan oo kale ah balse aan si buuxda loo fulin.
Bulshada Muqdisho ayaa rajeynaysa in markan balanqaadkan laga dhabeyn doono si loo hagaajiyo xaaladda amni iyo adeegyada magaalada, isla markaana looga hortago dhibaatooyinka soo noqnoqda ee ku habsada wadooyinka.
