MUQDISHO, Soomaaliya – Wasiirka Gaashaandhigga Soomaaliya, Axmed Macallin Fiqi, ayaa si cad u beeniyay warar sheegayay in Dowladda Federaalka ay ciidamo u dirtay gobollada waqooyi ee Sanaag iyo Sool, isagoo ku tilmaamay eedeymahaasi kuwo “aan sal iyo raad toona lahayn”.
Fiqi ayaa hadalkaan ka jeediyay war qoraal ah oo uu ku baahiyay baraha bulshada, isagoo ka falcelinayay cabashooyin isa soo taraya oo ka imaanaya madaxda maamul goboleedyada, gaar ahaan Puntland, kuwaas oo dowladda dhexe ku eedeeyay in ay ciidamo u dirayso deegaanno ay hore uga jireen xiisado siyaasadeed iyo amni.
“Waxaa jiray warar aan sal lahayn oo sheegaya in dowladda federaalku ciidamo u dirtay Sanaag iyo Sool. Waxaan si buuxda u beeninayaa eedeymahaas. Waa been abuur aan wax caddeyn ah la socon,” ayuu yiri Fiqi.
Wasiirku wuxuu carrabka ku adkeeyay in dowladda federaalku ka go’an tahay ilaalinta nidaamka federaalka ee dalka, isagoo ku tilmaamay “muuqaalka muhiimka u ah xasilloonida dalka iyo dhowrista dastuurka”. Wuxuu sidoo kale ka digay, sida uu hadalka u dhigay, “dadaallo ula kac ah oo ay wadaan dad aan la magacaabin”, kuwaas oo uu ku eedeeyay in ay wiiqayaan midnimada iyo madax-bannaanida qaranka.
“In la wiiqo nidaamka federaalka ah waxay la mid tahay in la wiiqo madax-bannaanida Soomaaliya,” ayuu raaciyay Fiqi, isagoo xusay in ilaalinta nidaamkaasi ay tahay mas’uuliyad wadajir ah oo saaran dhammaan saamileyda siyaasadeed ee dalka.
Hadalka Wasiirka ayaa imanaya iyadoo ay sii xoogeysanayaan khilaafaadka siyaasadeed ee u dhexeeya Dowladda Federaalka iyo Dowladda Puntland, kaddib hadallo dhowaan ka soo yeeray Madaxweynaha Puntland Saciid Cabdullaahi Deni, oo ku eedeeyay dowladda dhexe in ay xoogga saarayso dirista ciidamo cusub oo Puntland loo soo dirayo, halkii ay wax ka qaban lahayd halista Al-Shabaab ee ka taagan bartamaha dalka.
Xiriirka u dhexeeya dowladda dhexe iyo dowlad-goboleedyada federaalka ah ee dalka ayaa muddooyinkii u dambeeyay ahaa mid cakiran, gaar ahaan arrimaha la xiriira wada shaqeynta amniga, qaybsiga kheyraadka, iyo madax-bannaanida maamul goboleedyada.
