BOSAASO, Soomaaliya – Markab xamuul ah oo siday hub, islamarkaana la rumeysan yahay inuu leeyahay dowladda Turkiga, ayaa ku dhacay xeebaha deegaanka Raas Caseyr ee gobolka Bari, kaddib markii uu qabo cilad farsamo, sida ay u xaqiijiyeen ilo-amni oo la hadlay Radio Shabelle Sabtida Maanta ah.
Ciidamada ammaanka ee maxalliga ah ayaa la wargeliyey markii markabku uu ku xayirmay meel u dhow xeebta. Warar hordhac ah ayaa sheegaya in hub fudud oo saarnaa markabka la bililiqaystay, ka hor intii aan ciidamada badda Puntland (PMPF) gacanta ku dhigin goobta.
“Markabku wuxuu wajahay cilad farsamo, wuxuuna si lama filaan ah ugu dhacay xeebta. Inta aysan ciidamadu goobta gaarin, waxaa dhacay bililiqo hub fudud ah oo lagu sheegay in laga leeyahay Turkiga,” ayuu yiri mas’uul ka tirsan laamaha ammaanka gobolka, isagoo codsaday in aan la magacaabin.
Ilo wareedyo ayaa sheegaya in markabku laga yaabo inuu ku socday magaalada Muqdisho, inkastoo aan la helin xaqiijin rasmi ah oo muujinaysa halkii uu u socday ama cidda loogu waday hubka saarnaa.
Dhacdadan ayaa imaneysa xilli uu si isa soo taraya u kobcayo iskaashiga milatari ee u dhexeeya Soomaaliya iyo Turkiga, kaddib markii dhawaan la meel mariyey heshiis difaac badeed oo u ogolaanaya ciidamada Turkiga inay la shaqeeyaan Soomaaliya si loo sugo amniga baddeeda.
Baarlamaanka Turkiga ayaa sidoo kale ansixiyey in ciidamo iyo qalab milatari loo diro Soomaaliya si loogu taageero sugidda amniga badda.
Inkasta oo hubkii laga helay markabka uu shaki gelinayo xiriirka tooska ah ee u dhexeeya hubka iyo heshiiska difaaca badeed ee labada dal, haddana mas’uuliyiintu weli ma caddeyn in ay jirto wax xiriir ah.
Dowladaha Federaalka Soomaaliya iyo Puntland ayaa si wadajir ah u bilaabay baaritaan ku saabsan arrintan, xilli ay isa soo tarayaan walaac laga qabo tahriibinta hubka iyo xasillooni darrada gobolka.
