MUQDISHO, Agoosto 14, 2025 – Dowladda Soomaaliya ayaa subaxnimadii Maanta oo Khamiis ah toogatay saddex nin oo lagu helay xubinimo al-Shabaab ah iyo ku lug lahaanshaha dilal qorsheysan iyo qaraxyo ka dhacay magaalada Muqdisho iyo gobolka Shabeellaha Hoose, sida ay sheegeen mas’uuliyiin.
Ragga la toogtay ayaa lagu magacaabayay Abukar Axmed Maxamed, Xamse Jeylaani Cabdullaahi oo loo yaqaan “Abtiga”, iyo Xasan Cali Xuseen oo ku magac dheeraa “Garaad”.
Maxkamadda ciidamada qalabka sida ayaa xukuntay dilka saddexdan eedeysane, waxaana lagu fuliyay xukunka xabsi ku yaalla magaalada Muqdisho.
Mas’uuliyiinta ayaa sheegay in raggan lagu helay caddeymo muujinaya in ay ka dambeeyeen weerarro sababay dhimasho iyo dhaawac badan.
Toogashadooda ayaa tirada dadka lagu fuliyay xukun dil ah bishan Agoosto ee lagu helay xiriirka al-Shabaab ka dhigeysa lix.
Kooxda al-Shabaab, oo xiriir la leh al-Qaacida, ayaa dagaal hubeysan kula jirtay dowladda Soomaaliya tan iyo sanadkii 2007, iyada oo marar badan fulisay weerarro dhimasho leh oo ka dhacay caasimadda iyo gobollada dalka.
