WASHINGTON – Garsooraha caan ka ahaa Mareykanka, Frank Caprio [Faraank Kaabriyo], oo loo yaqaanay “Garsooraha ugu naxariista badan Mareykanka,” ayaa geeriyooday Arbacadii, 20-ka Agoosto, isagoo jiray 88 sano, kadib markii uu ku dhacay kansarka mindhicirka. Geeridiisu waxay calaamad u tahay dhammaadkii nolol dheer oo uu u huray caddaalad naxariis leh iyo adeeg dadweyne oo daacad ah.
Faraank Kaabriyo waxa uu ku dhashay kuna barbaaray magaalada Borofidensi ee gobolka Rood Aylaan. In ka badan 40 sano ayuu ka shaqeynayay maxkamadda degmada, isagoo caan ku noqday hab naxariis leh oo uu u dhegeysan jiray kiisaska horyimaada.
Wuxuu ka duwanaa garsoorayaal badan, isagoo mar walba isku dayi jiray in uu fahmo duruufaha dadka maxkamadiisa lasoo taago, halkii uu si adag u ciqaabi lahaa. Maxkamaddiisa waxay noqotay meel aad loo hadal hayo, maadaama eedeyaniyaasha lagu ixtiraamo, taasoo uu ku kasbaday ixtiraam badan bulshada gobolkiisaa iyo meelo ka baxsan.
Garsoore Caprio wuxuu si weyn u soo jiitay dareenka dadweynaha guud ahaan Mareykanka kadib markii barnaamijkiisa “Caught in Providence” la baahiyay intii u dhexeysay 2018 ilaa 2020. Barnaamijkan wuxuu muujinayay hab-dhaqankiisa bani’aadamnimo ee uu kula macaamili jiray dadka hortiisa yimaada.
Go’aamadiisa caddaaladda leh ee naxariista ku dhisan ayaa si weyn loogu baahiyay baraha bulshada, isagoo malaayiin qof ka kasbaday taageero iyo ixtiraam. Wuxuu sidoo kale helay dhowr abaalmarino, waxaana loogu yeeri jiray “Garsooraha ugu naxariista badnaa Mareykanka.”
Baraha bulshada sida TikTok, YouTube iyo Instagram, ayaa si gaar ah loogu faafiyay muuqaalladiisa, kuwaasoo ay dad badan ku ammaaneen sida uu u mideeyay caddaaladda iyo bani’aadamnimada.
Bishii December 2023, Faraank Kaabriyo wuxuu si cad u shaaciyay in laga helay kansarka mindhicirka. Inkasta oo cudurku aad halis u ahaa, haddana wuu sii waday la xiriirka taageerayaashiisa baraha bulshada, isagoo mar walba la wadaagaya fariimo mahadcelin iyo warbixinno ku saabsan xaaladdiisa. Maalin ka hor geeridiisa, wuxuu soo diray muuqaal qalbi taabanaya oo uu kaga mahadcelinayo taageerada iyo ducooyinka ay dadku la garab taagnaayeen.
Inta ka baxsan garsoornimada, Faraank Kaabriyo wuxuu ahaa aabe, awoowe, wuxuuna lahaa qoys weyn oo jecel. Qoyskiisa iyo bulshada ku xeeran waxay xusuusan doonaan sida uu naxariista iyo taageerada ugu fidin jiray qof walba oo noloshiisa ku jiray. Guddoomiyaha gobolka Rood Aylaan [Rhode Island], Dan MaKi, ayaa ku tilmaamay garsooraha “hanti qaran,” isagoo amar ku bixiyay in calanka gobolka hoos loo dhigo si loo muujiyo tacsida iyo mudnaantiisa.
Geerida Frank Caprio waxay reebtay saameyn weyn, balse noloshiisa iyo waqtigiisii uu siiyay bulshadda uu u adeegayay, ayaa si gaar ah u taabatay. Garsoore Faraank Kaabriyo wuxuu caddeeyay in caddaaladdu aysan ka hor imaan karin naxariista, balse ay labaduba is dhammaystiri karaan si loo dhiso bulsho wanaagsan.
