New York, 24 Sebtembar 2025 – Wasiirka Arrimaha Dibadda ee Boqortooyada Bahrain, Dr. Abdullatif bin Rashid Al Zayani, ayaa Talaadadii magaalada New York kulan kula yeeshay Wasiirka Arrimaha Dibadda ee Soomaaliya, Cabdisalaam Cabdi Cali, sida ay sheegeen masuuliyiin rasmi ah.
Kulanka oo ka dhacay xafiiska Joogtada ah ee Bahrain ku leedahay Qaramada Midoobay, ayaa diiradda lagu saaray xoojinta xiriirka laba geesoodka ah iyo baadhista fursado cusub oo iskaashi oo u dhexeeya labada dal.
Labada wasiir ayaa sidoo kale is dhaafsaday aragtiyo ku saabsan xaaladda gobolka iyo arrimo dan u ah labada dal.
Dr. Al Zayani ayaa ugu hambalyeeyay Wasiir Cabdisalaam xilka cusub ee loo magacaabay, isagoo mar kale muujiyay sida Boqortooyada Bahrain uga go’an tahay horumarinta iskaashiga labada dhinac, si gaar ah iyadoo labada dal ay haatan xubno aan joogto ahayn ka yihiin Golaha Ammaanka ee Qaramada Midoobay.
Wasiirka Bahrain ayaa sidoo kale rajeeyay in Wasiir Cabdisalaam uu guul ka gaaro howlihiisa diblomaasiyadeed, isaga oo xusay muhiimada ay leedahay in la sii xoojiyo iskaashiga siyaasadeed, dhaqaale iyo amni ee u dhexeeya Soomaaliya iyo Bahrain.
Kulanka waxaa sidoo kale ka qayb galay Danjire Jamal Faris Al Ruwaie, wakiilka joogtada ah ee Bahrain u fadhiya Qaramada Midoobay, iyo Danjire Sheekh Cabdulla bin Cali Al Khalifa, Agaasimaha Guud ee Xiriirka Laba Geesoodka ee Wasaaradda Arrimaha Dibadda.
