Nairobi, Kenya – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa haatan ku sugan magaalada Nairobi ee dalka Kenya, halkaas oo uu kaga qaybgalayo aaska qaran ee Ra’iisul Wasaarihii hore ee Kenya Raila Amolo Odinga, oo lagu qabanayo garoonka Nyayo Stadium.
Madaxweyne Xasan Sheekh ayaa la safan madaxda dalalka gobolka, madax sare oo caalami ah, iyo marti sharaf ka kala timid daafaha dunida, si ay uga qayb qaataan xuska iyo sagootinta ninkii si weyn u saameeyay siyaasadda Kenya iyo tan Afrika muddo ka badan 80 sano, laga bilaabo 1945 ilaa 2025.
Ka qaybgalka Madaxweynaha Soomaaliya ee munaasabaddan qaran waxa uu muujinayaa xiriirka dhow iyo iskaashiga istaraatijiyadeed ee u dhexeeya Soomaaliya iyo Kenya, iyo sidoo kale aqoonsiga heer gobol ee dhaxalka siyaasadeed ee uu ka tagay Raila Odinga — oo loo aqoonsaday halyey u taagnaa dimuqraadiyadda, caddaaladda, iyo midnimada Afrika.
Soomaaliya ayaa horey uga tacsiyeysay geerida Mr. Odinga oo ku geeriyooday 15-kii Oktoobar, 2025, iyadoo Madaxweyne Xasan Sheekh uu ku tilmaamay “siyaasi miisaan culus leh oo dhaxalkiisu sii jiri doono.”
Aaska maanta ee Nairobi ayaa qeyb ka ah taxane xus qaran ah oo lagu maamuusayo ninkii halgamaa ahaa, waxaana la guddoonsiiyay aaska qaran ee ugu sarreeya ee dalka Kenya.
