GURICEEL — Ciidamada ammaanka ee Galmudug ayaa gacanta kusoo dhigay nin loo haysto dilka ganacsade si weyn looga yaqaanay degmada Guriceel, kaddib markii habeenkii Axadda halkaas lagu toogtay.
Booliska ayaa sheegay in ninka la xiray oo magaciisa lagu sheegay Cabdifitaax Cali Xasan Diiriye lagu qabtay wax yar kadib dilka Deeq Cabdi Jaamac, oo ahaa dhallinyaro ganacsade ah oo caan ka ahaa Guriceel iyo guud ahaan gobolka Galgaduud.
Taliska booliska degmada Guriceel ayaa Isniintii saxaafadda u soo bandhigay eedaysanaha, iyagoo sheegay in dhowaan la horgeyn doono maxkamad. Saraakiishu waxay sheegeen in qabashada degdegga ah ay muujineyso sida ay uga go’an tahay xasilinta degmada oo baryahan wajahaysay dilal qorsheysan.
Shafi Jaamac Cabdi, ku-xigeenka taliyaha booliska degmada, iyo mas’uuliyiin kale oo goobta ka hadlay, ayaa cambaareeyay weerarka, waxayna uga digeen dadka ku lug leh dilalka odayaasha dhaqanka iyo xubnaha bulshada. Waxay sheegeen in rabshadaha cusub ay cabsi gelinayaan shacabka, kuna sii fogeynayaan xiisado qabiilka ku saleysan oo soo jireen ah.
Dilka Deeq Cabdi Jaamac ayaa noqday kii ugu dambeeyay silsilad aargoosi ah oo maalmahan ka socota qeybo ka mid ah Galgaduud iyo Mudug, kuwaas oo si weyn u saameynaya bulshada ku nool deegaanada maamulka Galmudug.
Mas’uuliyiintu waxay sheegeen inay kordhinayaan hawlgallada lagu joojinayo dhiigga daadanaya, hase yeeshee shacabka ayaa weli ka walaacsan retalitory killings-ka sii socda ee khatar gelinaya xasilloonida jilicsan ee bartamaha Soomaaliya.
