MUQDISHO — Madaxweynihii hore ee Soomaaliya Sheekh Shariif Sheekh Axmed ayaa sheegay in shacabka Soomaaliyeed iyo dalka guud ahaan aan weli loo diyaarsanayn in la qabto doorasho qof iyo cod ah, isaga oo ka digay khataro siyaasadeed iyo amni oo uu sheegay in ay weli xallin u baahan yihiin.
Isagoo Arbacadii wareysi siiyay BBC-da Laanta Af-Soomaaliga ayuu Sheekh Shariif ku dooday in dadaallada dowladda ee ku saabsan doorasho qof iyo cod ahi aysan ka tarjumayn xaaladda dhabta ah ee dalka, ayna weli ku kooban yihiin hadal siyaasadeed oo aan loo rogin qorshe wax ku ool ah ama heshiis siyaasadeed oo la wada leeyahay.
“Hal-qof-hal-cod hadal kaliya laguma gaaro. Waxaa u baahan sharciyo, xisbiyo shaqeynaya, iyo amni lagu kalsoonaan karo,” ayuu yiri madaxweynihii hore.
Sheekh Shariif oo ka hadlayay xaaladda amniga dalka ayaa sheegay in ay jiraan cabsi dhab ah oo ku saabsan sii jiritaanka hay’adaha dowladnimada haddii aan la helin qorshe mideysan oo dhammaan dhinacyadu ay ku heshiiyaan. Wuxuu tilmaamay in xaaladda amni ay gaartay heer halis ah, taas oo abuurtay walwal ku saabsan sida dalka u ekaan doono sanadaha soo socda.
Madaxweynihii hore ayaa si gaar ah u dhaliilay guddiga doorashooyinka ee dhawaan la magacaabay, isaga oo ku tilmaamay mid aan isku dheellitirnayn oo aan ka tarjumayn muuqaalka guud ee siyaasadda dalka.
“Guddigu wuxuu u baahan yahay in laga gaaro is-afgarad. Mid uu hal dhinac keliya soo magacaabo kalsooni ma gelinayo,” ayuu yiri.
Sheekh Shariif ayaa intaas ku daray in hal koox siyaasadeed — gaar ahaan tan ku dhow Villa Somalia — ay kaliya muuqaal ku leedahay habka diyaarinta doorashooyinka, taas oo uu sheegay in ay wiiqayso tartanka xisbiyada iyo mabda’a dimuqraadiyadda.
Wuxuu dowladda ugu baaqay in ay degdeg u dejiso hannaan siyaasadeed oo lagu heshiiyo, si looga hortago xiisado ka dhex dilaaca dowladda iyo mucaaradka, isla markaana loo ilaaliyo xasilloonida dalka.
Doorashooyinka deegaanka ee Muqdisho ayaa la filayaa in ay bilaabmaan dhammaadka bisha Diseembar 2025.
