Juba – Dowladda Jamhuuriyadda Suudaanta Koonfureed ayaa si rasmi ah u muujisay taageero buuxda oo ay u hayso mowqifyada Midowga Afrika (AU) iyo Urur-goboleedka IGAD ee la xiriira ilaalinta madax-bannaanida, midnimada iyo wadajirka dhuleed ee Jamhuuriyadda Federaalka Soomaaliya.
War-saxaafadeed ka soo baxay Wasaaradda Arrimaha Dibadda iyo Iskaashiga Caalamiga ah ee Suudaanta Koonfureed, kuna taariikheysan 16-ka Janaayo 2026, kana soo baxay magaalada Juba, ayaa lagu caddeeyay in Dowladda Suudaanta Koonfureed ay mar kale adkeynayso sida ay uga go’an tahay ixtiraamka midnimada iyo wadajirka dhuleed ee Soomaaliya, iyadoo lagu saleynayo xuduudaheeda caalamiga ah ee la aqoonsan yahay.
War-saxaafadeedka ayaa sidoo kale muujiyay taageerada joogtada ah ee Suudaanta Koonfureed ay la garab taagan tahay dadaallada lagu xoojinayo nabadda, xasilloonida iyo wada noolaanshaha Jamhuuriyadda Federaalka Soomaaliya, kuwaas oo muhiim u ah amniga iyo iskaashiga gobolka Geeska Afrika.
