Beirut, Lebanon – Xarunta Ciidamada Nabad Ilaalinta Ghana ee ku sugan Lebanon ayaa Jimcihii lagu qaaday weerar gantaallo ah, taasoo keentay in laba askari si daran loo dhaawaco, sida lagu sheegay bayaan ka soo baxay ciidamada Ghana.
Weerarkan ayaa yimid maalmo kadib markii Hezbollah ay u riday gantaallo dalka Israel, taasoo keentay in Israel ay bilowdo howlgallo cusub oo ka dhan ah kooxda Hezbollah, islamarkaana xiisad cusub ku abuurtay gobolka Bariga Dhexe.
Ciidamada Ghana ma shaacin cidda ka dambeysay weerarka, hase yeeshee Wasaaradda Arrimaha Dibadda Ghana ayaa dhacdada ka cabatay xarunta Qaramada Midoobay ee magaalada New York.
Bayaanka ayaa sidoo kale tilmaamay in hal askari uu la kulmay shoog nafsaani kadib markii xarunta martida iyo saraakiisha la degan yihiin la gubay, isla markaana qaar ka mid ah dhismayaasha la burburiyay.
Weerarkan ayaa muujinaya halista ay waji galayaan ciidamada nabad ilaalinta Ghana ee ku sugan gobollada colaadaha ka jira, iyo sida xiisadda Bariga Dhexe u saamaysay saraakiisha Qaramada Midoobay ee hawlaha nabad ilaalinta ka shaqeeya.
