Gaborone — Dowladda Botswana ayaa si rasmi ah u beenisay warar sheegayay inay martigelinayso saldhig milatari oo uu leeyahay United States, iyadoo ku adkaysatay in xarumaheeda militari ay si buuxda u maamusho dowladda dalkaasi.
Afhayeenka dowladda, Tuduetso Mokgosi, ayaa sheegay Talaadadii in saldhigga ciidamada cirka ee Thebephatshwa Air Base uu yahay mid madaxbannaan oo ay leedahay isla markaana ay si buuxda u maamusho dowladda Botswana, iyada oo loo marayo ciidamada difaaca dalka.
“Saldhiggan waxa uu u adeegaa danaha qaranka, oo ay ka mid yihiin xoojinta awoodda wax ka qabashada xaaladaha degdegga ah, taageeridda hawlgallada nabad ilaalinta iyo kuwa bini’aadantinimo ee gobolka, iyo ilaalinta diyaar garowga ciidanka,” ayuu yiri Mokgosi.
Wuxuu sidoo kale carrabka ku adkeeyay in doodaha la xiriira amniga qaranka ay muhiim u yihiin nidaamka dimuqraadiyadeed, balse ay tahay in lagu saleeyo xog sax ah oo la hubiyay.
Afhayeenka ayaa ka digay in faafinta macluumaad aan sax ahayn, gaar ahaan marka la buunbuuniyo, ay keeni karto isfaham la’aan ka dhex dhalata muwaadiniinta gudaha iyo dalalka deriska ah.
Dalka Botswana ayaa ka mid ah waddamada Afrika ee lagu ammaano xasilloonida siyaasadeed, dimuqraadiyadda iyo koboca dhaqaale ee joogtada ah, inkastoo uu mar ahaan jiray dal sabool ah markii uu xornimada qaatay.
