Muqdisho – Jamhuuriyadda Federaalka Soomaaliya waxay si adag u cambaaraynaysaa weerarrada ay Jamhuuriyadda Islaamiga ah ee Iran ku bartilmaameedsatay kaabayaasha tamarta muhiimka ah ee Boqortooyada Sacuudi Carabiya, Dawladda Qatar, iyo Imaaraadka Carabta. Tallaabooyinkani waxay ka dhigan yihiin xad-gudub weyn oo ka dhan ah sharciga caalamiga ah waxayna khatar gelinayaan amniga iyo xasilloonida gobolka.
War-saxaafadeed kasoo baxay Wasaaradda Arrimaha Dibadda Soomaaliya ayaa lagu sheegay in tallaabooyinkani ay yihiin “xad-gudub weyn oo ka dhan ah sharciga caalamiga ah” isla markaana khatar ku ah amniga iyo xasilloonida gobolka.
Soomaaliya ayaa dib u xaqiijisay taageeradeeda buuxda ee dowladaha iyo shacabka Sacuudiga, Qatar, iyo Imaaraadka Carabta, iyadoo sidoo kale muujisay inay taageersan tahay tallaabo kasta oo lagu ilaalinayo madax-bannaanidooda iyo amniga muwaadiniintooda.
War-saxaafadeedku wuxuu xusay baahida degdegga ah ee loo qabo dajinta xiisadda iyo wadahadalka, isagoo tilmaamay in Soomaaliya, oo ku taalla waddooyinka muhiimka ah ee badda, ay muhiimad weyn siineyso ilaalinta waddooyinka tamarta ee muhiimka u ah xasilloonida caalamka.
Dowladda Federaalka Soomaaliya ayaa sidoo kale cadeysay inay diyaar u tahay la shaqeynta saaxiibada gobolka iyo kuwa caalamiga ah si kor loogu qaado nabadda iyo ilaalinta kaabayaasha tamarta muhiimka ah.
