Beirut – Kooxda Hezbollah ayaa Sabtidii ku dhawaaqday lix weerar oo ka dhan ah Israa’iil, iyagoo beegsaday ciidammo, gaadiid dagaal iyo goobo milateri oo gudaha dalkaas ku yaal. Weerarradan ayaa ka mid ah falalka ay kooxda ku tilmaamtay “difaaca Lubnaan iyo dadkeeda,” iyadoo ay ku jawaabayaan waxa ay ugu yeereen gardarrooyin ay Israa’iil ku heyso dalkaas.
Kooxdu waxay tilmaamtay in weerarada la beegsaday xerada Limon ee Nahariya iyadoo la adeegsaday diyaarado aan duuliyaha lahayn, sadex xagalka Khalil ee Maroun al-Ras, deegaanka Talat al-Sadr ee Aita al-Shaab, iyo agagaarka goob ay ku soo degtay helikobter ay Israa’iil ka daad gureysay askarta dhaawaca ah. Intaa waxaa dheer, dagaalyahanada Hezbollah ayaa isku dhaceen ciidamada Israa’iil meel u dhow Taxriir, waxayna sidoo kale weerar ku qaadeen taangi Merkava ah oo ku sugnaa magaalada Houla, iyadoo la adeegsanayay gantaal la hagayay.
Tani waxay ka dhigtay tirada guud ee weerarrada Hezbollah tan iyo Maarso 2 in ay gaarto 1,422, sida laga soo xigtay wakaaladda Anadolu. Inkasta oo kooxda ay ku celcelisay in ficilladeeda ay yihiin difaac, ilaa hadda ma jiro war rasmi ah oo ka soo baxay Israa’iil oo ku saabsan khasaarooyin dhimasho ama dhaawac ah.
Weerarradan ayaa sii xoojiyay xiisadda gobolka, iyadoo falalka is-difaaca iyo weerarada milateri ee labada dhinac ay sii kordhinayaan halista khalkhalgelinta amniga iyo xasilloonida gobolka Bariga Dhexe iyo Lubnaan.
