MUSCAT, Cumaan – Wasiirka Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya, Cabdisalaan Cabdi Cali, ayaa magaalada Muscat ee dalka Cumaan kula kulmay hoggaanka sare ee shirkadda dowladeed ee ASYAD Group si ay uga wada hadlaan iskaashi ku saabsan horumarinta dekedaha, saadka isku dhafan iyo maalgashi istaraatiiji ah.
Kulanka ayaa waxaa hoggaaminayay Agaasimaha Guud ee ASYAD Group, Cumar bin Maxamuud Al-Mahrazi, iyadoo ay sidoo kale ka qeyb galeen masuuliyiin kale oo sare oo ka tirsan shirkadda.
ASYAD Group waa shirkad dowladeed oo laga leeyahay Cumaan, waxaana loo aas-aasay inay hormariso ganacsiga iyo isku xirka gaadiidka iyo saadka ee dalkaas iyo caalamkaba.
Wadahadallada labada dhinac ayaa diiradda lagu saaray sidii loo horumarin lahaa dekedaha Soomaaliya, loo ballaarin lahaa adeegyada saadka, isla markaana loo soo jiidan lahaa maalgashi la jaanqaadaya mudnaanta dhaqaale ee dalka.
Labada dhinac ayaa sidoo kale ka wada hadlay fursado wax ku ool ah oo lagu kordhin karo waxqabadka dekedaha, laguna xoojin karo isku xirka ganacsiga, si looga faa’iideysto awoodda badda ee Soomaaliya oo leh xeeb dheer iyo goob istaraatiiji ah oo isku xirta Badda Cas, Gacanka iyo Bariga Afrika.
Mas’uuliyiinta ayaa sheegay in wada-hadalladan ay muujinayaan dadaalka Soomaaliya ee ku aaddan inay noqoto xarun ganacsi iyo isu socod oo muhiim u ah gobolka.
Kooxda ASYAD ayaa dhankooda muujisay diyaar garow ay ku geli karaan iskaashi farsamo iyo qaabab maalgashi oo nidaamsan, taas oo horseedi karta heshiisyo mustaqbalka dhow laga gaaro dhinacyada dekedaha iyo saadka.
