BAHDO, Soomaaliya — Ciidanka Xoogga Dalka Soomaaliyeed (SNA) oo garabsanaya xoogagga dadka deegaanka, ayaa maanta oo Arbaco ah hawlgal ballaaran ka fuliyay deegaanka Boorey, oo qiyaastii 120 kiiloomitir u jira degmada Bahdo ee gobolka Mudug.
Saraakiisha ciidanka ayaa xaqiijiyay in hawlgalkan uu qayb ka yahay saddex howlgal oo isku dubaridan oo ka socda gobolka, kuwaas oo ujeedkoodu yahay in maleeshiyaadka Al-Shabaab looga saaro deegaannada ay ku dhuumaaleysanayaan.
Ugu yaraan 13 xubnood oo ka tirsan Al-Shabaab, oo ay ku jiraan saraakiil sarsare, ayaa lagu dilay goobta dagaalka.
Laba xubnood oo kale ayaa la sheegay inay baxsadeen iyagoo qaba dhaawacyo halis ah.
Saraakiisha hoggaaminaysa hawlgalka ayaa sheegay in ciidamadu ay hadda si buuxda u gacanta ku hayaan deegaanka Boorey, iyadoo lagu raad-joogo haraadiga maleeshiyaadkii goobta ka cararay si looga hortago inay dib isu abaabulaan.
Tallaabadan ayaa qayb ka ah qorshaha dowladda Soomaaliya ee lagu ballaarinayo amniga gobollada dhexe, xilli ciidamada qaranka iyo dadka deegaanka ay kordhiyeen weerarrada ka dhanka ah kooxaha hubeysan.
