Muqdisho – Dowladda Federaalka Soomaaliya ayaa si rasmi ah u soo dhaweysay Heshiiska Is-fahamka ee ay wada gaareen Dowladda Mareykanka iyo Jamhuuriyadda Islaamiga ah ee Iiraan, iyadoo ku tilmaantay tallaabo muhiim ah oo lagu dejinayo xiisadaha laguna xoojinayo nabadda iyo xasilloonida gobolka.
War-saxaafadeed ay dowladda Soomaaliya soo saartay ayaa lagu sheegay in Soomaaliya ay ku ammaanayso labada dhinac doorashadooda ku aaddan diblomaasiyadda iyo wadahadalka, kuwaas oo gacan ka geysan kara yareynta xiisadaha iyo horumarinta nabadda waarta.
Soomaaliya ayaa sidoo kale bogaadisay doorka ay ka qaateen dalalka Pakistan, Qatar, Masar, Sacuudi Carabiya iyo Turkiga dadaallada lagu taageerayay horumarka diblomaasiyadeed ee horseeday heshiiskan.
War-saxaafadeedka ayaa sidoo kale lagu xusay doorka uu Madaxweynaha Mareykanka, Donald Trump, ku lahaa dhiirrigelinta dadaallada nabadda iyo wada-hadallada u dhexeeya dhinacyada ay khusayso.
Dowladda Soomaaliya ayaa muujisay rajada ay ka qabto in heshiiska lagu fuliyo si daacadnimo iyo niyad-wanaag ku jirto, si loo ilaaliyo nolosha dadka rayidka ah, loo sugo xorriyadda isu-socodka, loogana hortago xaalad kasta oo horseedi karta xiisado hor leh.
Ugu dambeyn, Soomaaliya ayaa mar kale xaqiijisay mowqifkeeda ku aaddan taageeridda diblomaasiyadda, ixtiraamka shuruucda caalamiga ah iyo xallinta khilaafaadka si nabad ah, iyadoo soo dhaweysay dhammaan dadaallada lagu horumarinayo nabadda, amniga iyo xasilloonida Bariga Dhexe, Geeska Afrika iyo gobolka Badda Cas.
