KISMAAYO [SMN] — Madaxweynaha Jubbaland, Axmed Maxamed Islaam (Axmed Madoobe), ayaa subaxnimadii Sabtida ka ambabaxay Kismaayo isagoo ku safray diyaarad gaar ah, taas oo noqonaysa safarkiisii ugu horreeyay ee dibadda tan iyo markii uu mar kale lagu doortay doorasho dood dhalisay.
Doorashadii lagu qabtay Kismaayo bishii November ee la soo dhaafay ayaa muran dhalisay, iyadoo dowladda federaalka Soomaaliya ee Muqdisho aysan aqoonsan guushiisa, taas oo shaki gelisay sharciyadda hoggaamintiisa.
Axmed Madoobe ayaa u socdaalay Nairobi, Kenya, safarkiisan oo aan ahayn mid uun caadi ah balse looga golleeyahay in lagu wajaho qodobo muhiim ah oo ku saabsan siyaasadda Soomaaliya. Wuxuu la kulmi doonaa safiirro iyo wakiillo ka socda ururo caalami ah, isagoo ka wada hadli doona khilaafka u dhexeeya Jubbaland, oo ah mid ka mid ah maamullada is-maamula ee Soomaaliya, iyo dowladda dhexe. Khilaafkan oo salka ku haya arrimaha maamul-wanaagga, amniga, iyo qeybsiga kheyraadka ayaa sii xoogeysanaya.
Intaa kadib, Axmed Madoobe ayaa u sii gudbi doona Isutagga Imaaraadka Carabta, halkaas oo uu ka wado qorshe ballaaran oo lagu kasbanayo taageero goboleed iyo maalgelin lagu horumarinayo Jubbaland, gaar ahaan dhinacyada amniga iyo horumarka. Imaaraadka Carabta ayaa door muuqda ku leh siyaasadda Soomaaliya, iyagoo gacan ka gaysta mashaariic horumarineed iyo dadaallada ka dhanka ah argagixisada.
Khilaafka kala dhaxeeya dowladda federaalka ayaa cirka isku shareeray kadib isbeddello lagu sameeyay dastuurka iyo nidaamka doorashooyinka. Isbeddelladan ayaa su’aal geliyay qaab-dhismeedka federaalka iyo hufnaanta doorashooyinka, taas oo abuurtay kala qaybsanaan weyn. Dacwad ay dowladda federaalka u soo saartay Axmed Madoobe oo ku saabsan amar qabasho ayaa muujinaysa heerka uu gaaray khilaafka, taas oo tilmaamaysa dagaal siyaasadeed iyo sharciyeed oo soo socda.
Safarka Axmed Madoobe wuxuu noqon karaa mid go’aamiya mustaqbalka xiriirka Jubbaland la yeelan doonto dowladda federaalka iyo beesha caalamka.
