BUULOBURDE (SMN) – Wararka naga soo gaaraya gobolka Hiiraan ayaa sheegaya in saacadihii lasoo dhaafay ciidamada Xoogga dalka iyo kuwa deegaanka ay howlgallo ka sameeyeen agagaarka degmada Buuloburde ee gobolkaasi.
Ciidamada isbaheysanaya ayaa weerar ku qaaday goobo ay ku sugnaayeen Al-Shabaab oo ku yaalla deegaanada howlgallada laga sameeyay.
Sidoo kale ciidamada ayaa soo qabtay laba xubnood oo ka tirsan Al-Shabaab, kuwaas oo uu mid kamid ah yahay Ajnabi, sida ay sheegeen saraakiisha milatariga Soomaaliya.
Sidoo kale saraakiisha ayaa intaasi kusii daray in howlgallada xoogoodu ay ka dhaceen aagga deegaanka Beerayabaal, isla-markaana ay sii wadi doonaan maalmaha soo socda.
Xaaladda ayaa haatan ah mid kacsan, mana jiro wax hadal ah oo kasoo baxay dhanka Al-Shabaab oo ku aadan howlgalkaasi ee ay guulaha ka sheegteen ciidamada Xoogga dalka.
