WASHINGTON – Howlgalka ciidamada Mareykanka ee Soomaaliya ayaa si weyn u kordhay sanadkan, iyadoo tirada duqeymaha cirka ay ka badan yihiin tobanka jeer marka loo eego sanadkii 2024, sida ay xaqiijiyeen saraakiisha AFRICOM.
Sida uu sheegay Taliska Mareykanka ee Afrika (AFRICOM) Jimcadii, ciidamada Mareykanka ayaa sanadkan fuliyey in ka badan 100 duqeymo cirka ah gudaha Soomaaliya, taasoo ka soo horjeedda 10 duqeymood oo ay fuliyeen sanadkii hore xilliga Madaxweyne Biden.
Kordhinta howlgalka ayaa lagu muujiyey weerar muhiim ah oo Talaadadii ka dhacay Buuraleyda Golis ee Puntland, halkaasoo AFRICOM ay xaqiijisay duqeyn iskaashan oo lagu beegsanayey xubno ka tirsan ISIS-Soomaaliya, qiyaastii 66 km koonfur-bari ee Boosaaso.
Saraakiishu waxay sheegeen in howlgalka uu ahaa mid lala kaashaday Dowladda Federaalka Soomaaliya si loo daciifiyo shabakadaha argagixisada, hase yeeshee warar ka imanaya goobta ayaa sheegaya in dagaal culus uu ka dhacay, iyadoo la adeegsanayey diyaaradaha MQ-9 Reaper iyo helikobtarro, iyo in ay socotay ilaa afar saacadood, sidoo kalena ciidamada Mareykanka ay ku sugnaayeen goob u dhow god.
Saraakiisha milateriga ayaa beeniyey wararkaasi, AFRICOM-na waxay ku tilmaantay “aan sax ahayn” sheegashooyinka ku saabsan howlgal dhulka lagu sameeyey, iyagoo diiday in ay faahfaahin ka bixiyaan qalabka loo adeegsaday sababo la xiriira amniga howlgalka.
101 duqeymood ee sanadkan la fuliyey, 59 ayaa si gaar ah loogu beegsaday xubnaha ISIS-Soomaaliya.
