Beledweyne — Ciidamo ka tirsan Djibouti oo qeyb ka ah howlgalka AUSSOM ayaa gaaray magaalada Beledweyne si ay ula wareegaan waajibaadka amni ee ka socda halkaas iyo deegaanada Buulo Burde.
Guutada 13-aad ee cusub ayaa beddeshay Guutada 11-aad oo soo gabagabeysay muddo shaqo oo ay ka hayeen Beledweyne, Dhuusamareeb, iyo Buulo Burde.
Ciidamada cusub waxaa hoggaaminaya Axmed Aadan Cabdullaahi, waxaana garoonka diyaaradaha Ugaas Khaliif kusoo dhaweeyay taliyihii guutada xilka wareejinaysay, Maxamed Cumar Saciid, iyo saraakiil kale oo ka tirsan ciidamada Jabuuti ee AUSSOM.
Taliyaha Guutada 13-aad ayaa sheegay in ciidamadoodu diyaar u yihiin inay si buuxda ula wareegaan mas’uuliyadda howlgalka, isla markaana ay sii wadi doonaan taageeridda dadaallada lagu sugayo amniga, iyagoo la kaashanaya shacabka iyo dowladda Somalia.
Dhankiisa, Col. Saciid ayaa ku booriyay ciidanka cusub inay sii xoojiyaan xiriirka bulshada deegaanka, isla markaana ay ka dhabeeyaan ballanqaadyadii ay sameeyeen ciidankii ka horreeyay ee ku aaddanaa ilaalinta amniga iyo taageeridda shacabka.
Howlgalka AUSSOM ayaa door muhiim ah ka ciyaara xasillinta amniga gobollada bartamaha Soomaaliya, gaar ahaan meelaha ay weli ka jiraan khataraha kooxaha hubeysan ee Al-Shabaab.
