NAIROBI [SMN] – Dowladda Kenya ayaa shaaca ka qaaday in ay socdaal wadato oo waan-waan ah oo ay ka dhex waddo maamulka Jubaland iyo dowladda Federaalka Soomaaliya (DFS).
Wasiirka Deegaanka ee Kenya, Aadan Barre, ayaa sheegay in socdaalkii dhawaan ee Madaxweynaha Jubaland, Axmed Madoobe, ee Nairobi uu qeyb ka ahaa dadaallo wadatashi iyo waan-waan ah, oo ay DFS ogaatay.
“Socdaalkii Madaxweyne Axmed ee Nairobi wuxuu qayb ka ahaa waan-waan aan ka dhex wadno DFS. Waan laysla ogaa safarkaas, Kenya markasta waxay rabtaa Soomaaliya oo wadajirta oo xasiloon,” ayuu yiri Wasiir Aadan Barre, isagoo xusay in Kenya ay si dhab ah u doonayso in Soomaaliya ay noqoto mid xasiloon oo wadajir ah.
Sidoo kale, Wasiir Ducaale ayaa tilmaamay in Madaxweynaha Soomaaliya, Xasan Sheekh Maxamuud, uu markii uu joogay dalka Tanzania u sheegay in arinta Jubaland aan la xalin karin ilaa laga wada hadlo, isla markaana la helo nidaam diblumaasiyadeed oo kaliya lagu dhammeeyo khilaafka jira.
Wasiir Aadan Barre wuxuu sidoo kale sheegay in Kenya ay diyaar u tahay inay ka qayb qaadato taageerada iyo hagaajinta xiriirka ka dhexeeya DFS iyo Jubaland, iyadoo loo marayo habka wadaxaajood iyo iskaashi diplomasiyeed.
Arintaan ayaa muujineysa in Jubaland iyo dowladda Federaalka ay ku jiraan xilliga wada hadal, waxaana la filayaa in tallaabooyin dheeri ah oo lagu xallinayo khilaafka siyaasadeed ee ka dhexeeya ay dhacaan, iyadoo dalka ay ka jirto baahi weyn oo ku saabsan xasilooni iyo wadajir.
