GALCAD (SMN) – Warar kala duwan ayaa ka soo baxaya howlgal qorsheysan oo ay saacadihii lasoo dhaafay ciidamada Danab ka sameeyeen gobolka Galgaduud.
Howlgalkan ayaa waxaa lagu beegsaday goobo ay ku sugnaayeen Al-Shabaab, isla-markaana lagu burburiyayu kayd ay hub ah, sida ay sheegtay dowladda Soomaaliya.
“Howlgalka ayaa khasaare xooggan lagu gaarsiiyay Khawaarijta waxaana lagu burburiyay goobo Cadowga keyd u ahaa oo ay Sunta iyo alaadaha kale ee ay ka sameeyaan walxaha qarxa ay u yaaleen” ayaa lagu yiri war qoraal ah oo kasoo baxay dowladda Soomaaliya.
Sidoo kale dowladda ayaa shaaca ka qaadya in howlgalkan lagu dilay ugu yaraan 18 ka tirsanaa xubnaha Al-Shabaab oo ku sugnaa inta u dhexeysa Galcad iyo Bud-bud.
Dhanka kale ma jiro wax hadal ah oo kasoo baxay Al-Shabaab oo ku aadan howlgalkaas ee ay guulaha ka sheegteen ciidamada Xoogga dalka Soomaaliyeed.
Xaaladda ayaa weli kacsan, waxaana lagu soo warramayaa in dhaq-dhaqaaqyo iska soo horjeedo ay ka socdaan qaybo kamid ah gobolka Galgaduud ee bartamaha Soomaaliya.
