DHUUSAMAREEB (SMN) – Warar kala duwan ayaa kasoo baxaya dagaal culus oo saaka ka dhacay deegaanka Masagawaa ee bariga gobolka Galgaduud, kaas oo u dhexeeyay ciidamada dowladda, kuwa Macawiisleyda iyo maleeshiyaadka kooxda Al-Shabaab.
Dagaalka ayaa waxaa soo qaaday Al-Shabaab, waxaana kadib iska caabin ay kala kulmeen ciidamada dolwadda iyo kuwa Macawiisleyda.
Wararka ayaa intaasi kusii daraya in dagaal saacado badan qaatay uu ka dhacay halkaasi, waxaana la’isku adeegsaday hubka noocyadiisa kala duwan, sida ay sheegeen dadka deegaanka.
Saraakiil ka tirsan ciidanka Xoogga dalka ayaa sheegay in guul wayn ka gaareen dagaalka, ayna khasaare xoogleh gaarsiiyeen xubnaha Al-Shabaab oo isku aruusanayay halkaasi.
Xaaladda ayaa haatan ah mid aad u kacsan, mana jiro wax hadal ah oo kasoo baxay dhinaca Al-Shabaab oo ku aadan dagaalkaasi.
