KISMAAYO (SMN) – Wararka naga soo gaaraya gobolka Jubbada Hoose ayaa sheegaya in xalay dagaal u dhexeeyay Al-Shabaab iyo ciidamada Jubbaland uu ka dhacay duleedka magaallo xeebeedka Kismaayo ee xarunta KMG ah ee maamul goboleedka Jubbaland.
Dagaalka oo ahaa mid xoogan ayaa yimid, kadib markii ay xoogaga Al-Shabaab weerar ku qaadeen saldhig ay ciidamada Jubbaland ku leeyihiin deegaanka Cabdalla Biroole.
Ilo dadka deegaanka ah ayaa innoo sheegay in weerarka kadib uu xigay dagaal toos ah oo u dhexeeyay labada dhinac, balse ma cadda khasaaraha rasmiga ah ee ka dhashay.
Xaaladda ayaa weli ah mid aad u kacsan, waxaana lagu soo warramayaa in haatan dhaq-dhaqaaqyo iska horjeedo ay ka wadaan duleedka magaalada Kismaayo.
Jubbooyinka oo ay weli ku xoogan tahay kooxda Al-Shabaab ayaa waxaa haatan ka socdo howlgallo culus oo ay iska kaashanayaan ciidamada Xoogga dalka iyo kuwa Jubbaland.
