MUQDISHO (SMN) – Taliyaha Ciidanka Dhulka Jeneraal Dayax Cabdi Cabdulle ayaa ka warbixyay dagaal culus oo saacadihii lasoo dhaafay ka dhacay duleedka deegaanka Caad ee koonfurta gobolka Mudug..
Taliyaha ayaa shaaca ka qaaday in dagaalkaas khasaare culus lagu gaarsiiyay Al-Shabaab, kadib markii ciidamada dowladda iyo kuwa deegaanka ay weeerar ku qaadeen halkaasi.
Sidoo kale wuxuu tilmaamay in la burburiyay saldhigyo ay kooxda ku lahayd halkaasi, gaadiid dagaal iyo hubna laga soo furtay, sida uu hadalka u dhigay.
“Ciidanka waxay weerar ku qaadeen fariisimo ay lahaayeen kooxaha falaagada, kaas oo saacado badan socday, waxaa lagu gaarsiiyay jab xoog leh, waxaan la burburiyay saldhigyo badan ay ku lahaayeen soonaha Caad”. ayuu yiri Taliyaha Ciidamada Dhulka.
Gobolka Mudug ayaa waxaa ka socda howlgallo xoreyn ah oo ay iska kaashanayaan ciidamada Xoogga dalka iyo kuwa deegaanka, kuwaas oo dhul looga saaray Al-Shabaab.
