Muqdisho, Jan 3 — Wasiirka Gaashaandhigga Soomaaliya, Axmed Macallin Fiqi, ayaa maanta sheegay in Ciidamada Qalabka Sida ee Soomaaliya, oo kaashanaya saaxiibada caalamiga ah, ay dileen labo hoggaamiye oo ka mid ahaa kuwa ugu sarreeya kooxda Al-Shabaab, kadib duqeyn si xeel dheer loo qorsheeyay oo ka dhacday degmada Jilib ee gobolka Jubbada Dhexe.
Wasiir Fiqi oo shir jaraa’id ku qabtay magaalada Muqdisho ayaa sheegay in howlgalkaas uu fuliyay Hay’adda Sirdoonka iyo Nabad Sugidda Qaranka (NISA) 10-kii December 2025, isagoo tilmaamay in Jilib ay tahay xarun muhiim u ah Al-Shabaab, laguna diyaariyo hoggaanka, tababarrada dagaalyahannada iyo qaraxyada.
Labada hoggaamiye ee la dilay ayuu wasiirku ku kala magacaabay Cabdullaahi Cismaan Maxamed Abuu Bakar, oo loo yaqaanay “Engineer Ismail”, kaas oo ahaa khabiirka ugu weyn ee qaraxyada kooxda, iyo Cabdikariin Maxamed Xirsi “Qoorleex”, oo mas’uul ka ahaa ammaanka gudaha iyo qorsheynta weerarrada dibadda.
“Labadan nin waxay si toos ah mas’uul uga ahaayeen qaraxyo, dilal qorsheysan iyo falal argagixiso oo waxyeello weyn u geystay shacabka Soomaaliyeed,” ayuu yiri wasiirka.
Wasiirka Gaashaandhigga ayaa sidoo kale sheegay in howlgal kale oo ay fuliyeen Ciidamada Gaarka ah ee Danab, kuna dhacay deegaanka Buulo Fulaay, lagu dilay in ka badan 20 dagaalyahan oo Al-Shabaab ah, isla markaana lagu burburiyay Idaacadda Andalus, oo ahayd warbaahin ay kooxda u adeegsan jirtay dacaayad.
Fiqi ayaa intaas ku daray in dib loo furay waddada xeebta ee isku xirta Muqdisho iyo Marka, taas oo muddo dheer ay Al-Shabaab ku carqaladeyn jirtay isu socodka dadka iyo ganacsiga.
Wasiirku wuxuu ammaanay doorka NISA ee dhinaca sirdoonka, wuxuuna uga mahadceliyay Dowladda Mareykanka taageerada hawada ee ay ka geysatay howlgalada.
“Bishii la soo dhaafay, Al-Shabaab waxay la kulantay khasaaraha ugu weyn ee hoggaanka iyo dagaalyahannada. Hoggaamiye argagixiso ah oo ka baxsan gaarta dowladda ma jiro,” ayuu yiri.
Kooxda Al-Shabaab, oo xiriir la leh Al-Qaacida, ayaa in ka badan 15 sano dagaal kula jirtay dowladda Soomaaliya iyo saaxiibadeeda caalamiga ah.
