MUQDISHO (SMN) – Iyadoo markale laga jawaabaayo codsi ka yimid shacabka iyo maamulka Diinsoor ee gobolka Baay, ee ahaa in gargaar hay’adda SoDMA gaarsiisay maalintii Arbacadii Todabaadkii hore aysan ku filneen baahida halkaas ka jirta ayaa maanta hay’adda Maareynta Musiiboyinka Qaranka, oo cidsigaas ka duulaysa waxa ay halkaas u dirtay diyaarad sida shixnad gargaar raashin ah.
Gargaarkaan hay’adda SoDMA, waxa ay ugu talagashay in la gaarsiiyo danyarta iyo qoysaska barakacyasha ah ee ku nool degmadaan oo muddo go’doon ku jirtay, si ay uga gaashaantaan abaarta cabsida laga muujinayo in dalka qeybo kamid ah ku dhufato.
Mucaawinadan waxaa dalkeenna gu deeqay Dowladda Shiinaha oo ku wareejisay Hay’adda Maareynta Musiibooyinka ee SoDMA.
Waa diyaaraddii 3-aad oo halkaas hay’adda u dirtay, maadaama ay Diinsoor kamid tahay deegaanno muddo go’doonsan oo ay dhibaatooyin ku hayaan maleeshiyaadka Al-Shabaab.
