Muqdisho – Ciidamada Xoogga Dalka Soomaaliyeed oo ay taageerayaan ciidamada Uganda iyo kuwa Midowga Afrika ayaa dilay in ka badan 30 dagaalyahan oo ka tirsanaa kooxda Al-Shabaab, kadib howlgal wadajir ah oo ka dhacay koonfurta Soomaaliya.
Howlgalka ayaa laga fuliyay agagaarka saldhigga hore ee Bulu-nagaad, waxaana lagu beegsaday fariisimo ay Al-Shabaab ku lahaayeen gobolka Shabeellaha Hoose, sida lagu sheegay war-saxaafadeed kasoo baxay Howlgalka Taageerada iyo Xasilinta Midowga Afrika ee Soomaaliya (AUSSOM).
AUSSOM ayaa sheegtay in howlgalka uu daba socday weerar ay Al-Shabaab ku qaadeen ciidamada dowladda Soomaaliya iyo kuwa Midowga Afrika, kuwaas oo baacsanayay maleeshiyaad laga saaray magaalooyin ku yaalla xeebaha, intii lagu jiray hawlgalka militari ee uu hoggaaminayay ciidanka Soomaaliyeed ee loo bixiyay “Duufaanta Ammusan”.
Wararka ayaa sidoo kale sheegaya in dhowr xubnood oo kale oo ka tirsan Al-Shabaab ay ku dhaawacmeen dagaalka. AUSSOM ayaa ballanqaadday in ciidamada wadajirka ah ay sii wadi doonaan howlgallada lagu wiiqayo awoodda kooxda Al-Shabaab, si loo xaqiijiyo nabad, xasillooni iyo amni waara oo ka hanaqaada Soomaaliya iyo guud ahaan Geeska Afrika.
Tan iyo bishii Luulyo 2025, Ciidanka Xoogga Dalka Soomaaliyeed oo kaashanaya AUSSOM iyo saaxiibo caalami ah ayaa xoojiyay howlgallada militari ee ka dhanka ah kooxda Al-Shabaab.
Dhanka kale, Golaha Ammaanka ee Qaramada Midoobay ayaa bishii December cusboonaysiiyay mandat-ka howlgalka Midowga Afrika, iyadoo la kordhiyay oggolaanshihiisa ilaa 31-ka December 2026.
