CEELDHEER, Soomaaliya – Taliyaha Ciidanka Dhulka ee Ciidanka Xoogga Dalka Soomaaliya, Jenaraal Sahal Cabdullahi Cumar, ayaa booqasho ku tegay degmada El-Dheer, kadib dagaallo xooggan oo jimcihii dhexmaray ciidamada dowladda iyo maleeshiyo deegaanka oo si guul leh uga hortagay weerar Al-Shabaab ku qaaday degmadaas.
Intii uu booqashada ku sugnaa, Jenaraal Sahal ayaa amaanay geesinimada iyo dadaalka ciidamada Xoogga Dalka iyo maleeshiyada deegaanka ee kaashanaya, isagoo ku bogaadiyey sida ay degmada u difaaceen iyo khasaaraha culus ee ay ku gaarsiiyeen dagaalyahanada Al-Shabaab.
“Waxaan hambalyo u dirayaa ciidamada dadaalkooda iyo geesinimadooda, waxaana ku adkaynayaa in howlgallada ka dhanka ah argagixisada ay sii socon doonaan ilaa Al-Shabaab si buuxda looga ciribtiro dalka, Soomaaliya na si buuxda loo xoreeyo,” ayuu yiri.
Sida uu sheegay Guddoomiyaha degmada El-Dheer, Cabdiraxmaan Axmed Cumar, in ka badan 70 dagaalyahan oo Al-Shabaab ka tirsan ayaa lagu dilay dagaalkaas oo saacado badan socday.
Dagaalka ayaa sidoo kale waxaa ku dhintay lix askari oo ka tirsan ciidamada dowladda, halka 14 kalena ay ku dhaawacmeen, sida ay warbixinta ka soo saartay Wasaaradda Gaashaandhigga Soomaaliya.
