Baydhabo, Soomaaliya – Madaxweynaha Dowlad-goboleedka Koonfur Galbeed, Cabdicasiis Xasan Maxamed (Laftagareen), ayaa digniin culus u diray siyaasiyiinta mucaaradka ah ee kasoo horjeeda maamulka, isaga oo ka digay fal kasta oo lagu carqaladeynayo nabadda iyo horumarka ka jira deegaanada Koonfur Galbeed.
Madaxweyne Laftagareen ayaa hadalkan ka jeediyay kulan ballaaran oo ay ka qeyb galeen qeybaha kala duwan ee bulshada gobolka, madaxda maamulka, iyo saraakiil sare oo ka tirsan laamaha amniga.
“Ma aqbali doonno wax kasta oo lagu dhaawacayo dowladnimada, nabadda iyo horumarka Koonfur Galbeed. Cid kasta oo isku dayda in ay qalalaase abuurto, tallaabo adag ayaa laga qaadi doonaa,” ayuu yiri Madaxweynaha.
Waxa uu shacabka iyo siyaasiyiinta ugu baaqay in ay ka fogaadaan hadallo iyo ficillo keeni kara qalalaase siyaasadeed ama amni darro, isaga oo xusay in xasilloonidu ay tahay tiirka ugu muhiimsan ee lagu gaari karo horumar waara.
Madaxweyne Laftagareen ayaa sidoo kale carrabka ku adkeeyay baahida loo qabo in la ilaaliyo midnimada shacabka iyo wada-shaqeynta hay’adaha dowladda, si loo xaqiijiyo adeegyo bulsho iyo koboc dhaqaale oo gaara dhammaan deegaannada maamulka Koonfur Galbeed.
Hadalkan ayaa imaanaya xilli ay jirto xaalad siyaasadeed oo isa soo taraysa, iyadoo qaar ka mid ah siyaasiyiinta mucaaradka ay dhaliil u jeedinayaan maamulka Laftagareen, iyagoo ku eedeeyay in uu luminayo kalsoonida shacabka. Si kastaba, maamulka ayaa ku adkeysanaya in amniga iyo horumarka ay yihiin mudnaanta koowaad.
