KISMAYO — Madaxweynaha Dowladda Goboleedka Jubaland, Mudane Ahmed Mohamed Islam (Axmed Madoobe), ayaa maanta guddoomiyay shirka Golaha Wasiirrada ee maamulka, kaas oo lagu gorfeeyay arrimaha amniga, xaaladda siyaasadda guud ee dalka, iyo gurmadka abaaraha ka jira deegaanada Jubaland.
Wasaaradda Amniga Gudaha ayaa Golaha la wadaagtay warbixin faahfaahsan oo ku saabsan xaaladda amniga ee Jubaland, iyadoo laga warbixiyay howlgaladii ugu dambeeyay ee ciidamada ammaanku ka fuliyeen deegaano kala duwan. Warbixinta ayaa sheegtay in howlgalladaasi ay keeneen guulo wax ku ool ah, kuwaas oo lagu xoojinayo nabadgelyada iyo xasiloonida guud ee gobolka.
Waxaa sidoo kale shirka lagaga hadlay xaaladda siyaasadeed ee dalka, iyadoo laga dooday xiriirka u dhexeeya Jubaland iyo Dowladda Federaalka ee Soomaaliya. Madaxweyne Axmed Madoobe ayaa dhowaan booqasho ku tagay magaalada Muqdisho, halkaas oo ay uga socdeen wadahadallo la xiriira arrimaha siyaasadda iyo doorashooyinka dalka. Si kastaba ha ahaatee, waxaa jira muuqaal muujinaya in weli ay jiraan kala duwanaansho siyaasadeed oo u dhexeeya Jubaland iyo Dowladda Federaalka, gaar ahaan xaaladda doorashadii madaxda Jubaland oo ay Dowladda Federaalka sheegtay inaysan aqoonsaneyn.
Dhanka kale, shirka Golaha Wasiirrada ayaa si weyn diiradda loogu saaray gurmadka abaaraha, iyadoo la faray hay’adaha ay khusayso in ay sii dardargeliyaan dadaallada lagu taageerayo bulshada ay saameeyeen abaaraha ba’an ee ka jira qaybo ka mid ah Jubaland.
War-murtiyeed laga soo saaray shirka ayaa lagu adkeeyay in Dowladda Jubaland ay sii wadi doonto dadaallada ku aaddan sugidda amniga, xoojinta siyaasadda gudaha, iyo gurmadka bani’aadmiga ah ee lagula jiro abaaraha si loo caawiyo shacabka dhibaataysan.
