MOGADISHU [SMN] — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa garoonka diyaaradaha Muqdisho ku soo dhaweeyey askar ka tirsan Ciidanka Xoogga Dalka Soomaaliyeed (SNA) oo dhaawacyo soo gaaray, kuwaas oo ka qayb galay dagaalkii ka dhacay HirShabelle, iyadoo looga hortagay weerarada Al-Shabaab.
Madaxweynaha ayaa muujiyey taageeradiisa ku aaddan askarta, isagoo u rajeeyay bogsasho degdegga ah. Sidoo kale, wuxuu cadeeyey in Dowladda Federaalka Soomaaliya ay si joogto ah usii wadayso howlgallada lagula dagaalamyo Al-Shabaab.
Askarta dhaawacmay ayaa wax ku noqday dagaalkii dhawaan ka dhacay gobolka Shabeellaha Dhexe, halkaas oo ay dagaal adag kula galeen xubnaha Al-Shabaab.
Madaxweynaha ayaa ku amaanay geesinimada iyo dadaalka ay muujinayaan, isagoo tilmaamay in iyaga iyo askar kale ay yihiin geesiyaal dalkooda u halgamaya.
Tani waxay qeyb ka tahay dadaallada joogtada ah ee dowladda Soomaaliya ay ku adkeynayso awoodda ciidan ee dalka, iyadoo loo qorsheynayo in la xoojiyo la dagaallanka kooxda Al-Shabaab, taas oo xiriir la leh ururka Al-Qaeda.
Al-Shabaab ayaa sidoo kale sii wadda weerarrada ay ku hayaan ciidamada dowladda iyo saldhigyada ciidamada midowga ee ku sugan gobolka, iyadoo ay ugu dambeysay weeraradii dhacay toddobaadkii hore ee ka dhacay saldhigyo ay ciidamadu ku lahaayeen gobolka Shabeellaha Dhexe.
