Muqdisho – Hassan Sheikh Mohamud, Madaxweynaha Jamhuuriyadda Federaalka Soomaaliya, ayaa hambalyo iyo bogaadin u diray dhammaan haweenka Soomaaliyeed meel kasta oo ay joogaan, munaasabadda International Women’s Day ee 8-da Maarso.
Madaxweynaha ayaa sheegay in haweenka Soomaaliyeed ay laf-dhabar u yihiin horumarka bulshada iyo dhismaha dowladnimada, isla markaana ay door muhiim ah ka qaataan halganka qaran ee lagula jiro Khawaarijta. Waxa uu xusay in haweenku ay kaalin muuqata ku leeyihiin howlgallada xoreynta iyo barnaamijyada dib-u-heshiisiinta bulshada.
Sidoo kale, Madaxweynaha ayaa tilmaamay in haweenka Soomaaliyeed ay hormuud ka yihiin horumarinta dimuqraadiyadda dalka, gaar ahaan dadaallada lagu hirgelinayo doorashooyin dadweyne oo ku dhisan nidaamka qof iyo cod.
Federal Government of Somalia ayuu sheegay inay ka go’an tahay xoojinta ka-qaybgalka haweenka ee hoggaaminta, siyaasadda iyo go’aan-qaadashada heerarka kala duwan ee dowladda.
Ugu dambayn, Madaxweynaha ayaa ku bogaadiyey haweenka Soomaaliyeed dadaalkooda, dulqaadkooda iyo kaalintooda lama illaawaanka ah ee ay ku leeyihiin horumarka dalka, isagoo u rajeeyey horumar iyo guulo joogto ah.
