MUQDISHO, Juun 1 — Madaxweynaha Soomaaliya Xasan Sheekh Maxamuud ayaa Maanta ku dhawaaqay in Wadahadalladii Qaran ee muddo dheer dib u dhacay la qaban doono 15-ka bisha Juun, kadib cadaadis xooggan oo uga yimid beesha caalamka oo ku baaqeysay is-afgarad siyaasadeed oo dhex mara dowladda federaalka iyo mucaaradka.
Go’aanka madaxweynaha ayaa imaanaya xilli ay isa soo tarayeen warar sheegaya in beesha caalamku ay qorsheynaysay inay dhex-dhexaadin rasmi ah ka gasho khilaafka siyaasadeed ee sii xoogeysanaya. Madaxweynaha ayaa horey uga fogaaday inuu si toos ah ula fariisto mucaaradka, halka dadaalladiisii uu ku doonayay inuu kala qaybin ku sameeyo garabkaas ay badankood fashilmeen.
Wadahadallada la qorsheeyay waxay imaanayaan maalin kadib markii hoggaamiyeyaasha mucaaradka ay Sabtidii fiidkii soo saareen bayaan mideysan oo ay si cad uga soo horjeesteen wax ka beddelka dastuurka ee dowladda ay si keli ah u sameysay, iyo doorashooyin lagu muransan yahay.
Khilaafka siyaasadeed ee sii kordhaya ayaa walaac ku abuuray saaxiibada caalamiga ah ee Soomaaliya, kuwaasoo dhowr jeer ugu baaqay madaxda dalka inay furaan wada-hadallo daahfuran oo ay ka qeyb galaan dhammaan dhinacyada si loo ilaaliyo xasilloonida iyo horumarka dimoqraadiyadeed ee dalka.
Iyadoo Soomaaliya ay wajahayo caqabado dhinaca amniga iyo dhaqaale, khubaro siyaasadeed ayaa sheegaya in guusha shirka la filayo uu noqon karo mid go’aamin doona jihada mustaqbalka siyaasadeed ee dalka.
