Addis Ababa, Itoobiya –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo ayaa si diiran loogu soo dhoweeyay magaalada Addis Ababa ee caasimadda dalka Itoobiya.
Madaxweynaha ayaa kala qeyb galaya Hoggaamiyeyaasha Afrika Meertada 39-aad ee Shir Madaxeedka Midowga Afrika, isagoo xoojinaya dadaallada diblumaasiyadeed ee ku aaddan difaaca midnimada iyo wadajirka Qaranka Soomaaliyeed.
Sidoo kale, Madaxweyne Xasan Sheekh Maxamuud ayaa kulan-doceedyo la yeelan doonaa madaxda gobolka iyo kuwa Afrika ee Shirka ka qeyb-galaya, isagoo ku bogaadinaya, kuna adkaynaya mowqifka taariikhiga ah ee ay ka istaageen xadgudubka sharci darrada ah ee Israa’iil ay kula kacday midnimada Soomaaliya, ugana mahadcelinaya taageerida xubinnimada dalkeenna ee Golaha Ammaanka iyo Nabadda Afrika.
Madaxweynaha ayaa la filayaa inuu safarkiisa uga sii gudbo dalal kale, inkastoo aan si rasmi ah loo shaacin ajandaha dhammeystiran ee booqashadiisa.
Dhanka kale, mucaaradka siyaasadeed ee dalka ayaa weli ku sugan Muqdisho, iyagoo sugaya wada-xaajood la xiriira arrimaha doorashada iyo dib-u-eegista dastuurka, kuwaas oo kamid ah qodobbada siyaasadeed ee ugu muhiimsan ee haatan taagan.
